Map

Stefán Kristjánsson sigraði á Fastus mótinu 2013

19.febrúar 2013

Vel heppnuðu skákmóti sem kennt er við Fastus er nú lokið eftir skemmtilega keppni. Stefán Kristjánsson, stórmeistari, varð hlutskarpastur 30 keppenda, hlaut 6 vinninga af 7 mögulegum. Hann kom greinilega vel undirbúinn til leiks og var sá eini keppenda sem tapaði ekki skák.  Úrslit mótsin réðust í raun í 6. umferð þegar stórmeistararnir tveir, Stefán og Þröstur, leiddu saman hesta sína en þeir voru jafnir og efstir fyrir þá rimmu.

Í 2.-4. sæti á mótinu urðu kapparnir Sigurbjörn Björnsson, Karl Þorsteins, alþjóðlegur meistari, og Þröstur Þórhallsson, stórmeistari, með 5 vinninga hver. Rétt á hæla þeirra með 4,5 vinninga komu Ingvar Þór Jóhannesson, Jón Viktor Gunnarsson, alþjóðlegur meistari, Daði Ómarsson og Benedikt Jónasson, sem átti góðan endasprett, hlaut 4 vinninga úr síðustu 5 skákunum.

Góðir gestir

Fastus mótið er eitt sterkasta mót ársins á Íslandi en í mótinu tóku m.a. núverandi Íslandsmeisarar karla og kvenna, stórmeistarar og alþjóðlegir meistarar.  Ólympíulið kvenna var meðal boðsgesta og stóðu þær valkyrjur sig með miklum sóma. Hallgerður Þorsteinsdóttir lagði m.a. Björn Þorsteinsson, fyrrum Íslandsmeistara og Jóhanna Björg Jóhannsdóttir gerði sér lítið fyrir og sigraði aljóðlega titilhafann Benedikt Jónasson en hástökkvari mótsins í stigum talið var Elsa María Kristínardóttir sem hækkaði um 26 eló-stig.

Áhersla á lítt virka skákmenn

Í Fastus mótinu er lögð sérstök áhersla á þátttöku skákmanna, sem hafa lítið teflt síðustu árin eða jafnvel áratugina. Það er afar ánægjulegt að þekkta skákmenn eins og Karl Þorsteins og Þröst Árnason aftur að skákborðinu – miklar kempur sem hafa ekki teflt á kappskákmótum, í áratugi.  Fyrirkomulag mótsins hefur þann kost að aðeins er teflt einu sinni í viku, þannig að þeir sem njörvaðir eru niður við dagleg störf hafa svigrúm til að taka þátt. Greinilegt að þessi tilhögun mælist vel fyrir meðal íslenskra skákmanna.

Þó að hart væri barist á mótinu var skemmtilegt samneyti, spjall og spaug snar þáttur í upplifuninni. Skákfélagið Goðinn-Mátar þakkar Fastus góðan stuðning, keppendum drengilega framgöngu og áhorfendum áhugann. 

Bergþóra Þorkelsdóttir, framkvæmdastjóri Fastus, afhendir Stefáni Kristjánssyni, stórmeistara, viðurkenningu fyrir 1. sætið í mótinu.    




Þessi síða notar vafrakökur
Það er til þess að tryggja eðlilega virkni og notendaupplifun. Með því að halda áfram notkun síðunnar, samþykkir þú notkun vafrakaka